Boipobolo jwa Belhar

Leader – L               Congregation – C

L  Re dumela mo Modimong o le nosi: Rara, Morwa le Mowa o o Boitshepo. Modimo o o ikokoanyetsang Kereke, O a e sireletsa le go e tlhokomela, go tloga tshimologong ya lefatshe go isa pheletsong.

C  Re dumela Kereke e le nosi ya Bokeresete.

Kereke e e Boitshepo.

Kereke e e akaretsang, e leng kopano ya bana ba Modimo, ba ba biditsweng go tswa ditshikeng tsotlhe tsa batho.

L   Re dumela gore tiro ya poelano ya ga Keresete e tsala bongwe jwa Kereke, gonne bongwe jwa Kereke ke neo ya Modimo, mme ke maikaelelo a re a direlang ka thata go a fitlhelela.

C   Bongwe jwa Kereke bo tshwanetse go tlhagelela gore batho ba ba re potologileng ba tle ba bone jaaka kgaogano le letlhoo di fenngwa mo go Keresete.

L   Re dumela gore tumelo ya boammaruri mo go Keresete ke one motheo fela o le nosi wa go nna tokololo ya kereke eno ya Bokeresete.

C   Ka mokgwa o o ntseng jalo, re tsholola le go latlha puo ya go re mmala wa motho, maemo, bong kgotsa ngwao di tshwanetse go re tlhagisetsa gore e tshwanetse ya nna mang tokololo ya kereke e.

L   Re dumela gore Modimo o neile Kereke molaetsa wa poelano, le gore Kereke e bileditswe go nna letswai le lesedi la lefatshe.

C  Ka ntlha eo, re latlha tumelo ya go re efangedi e tlhotlheletsa kgaogano mo motheong wa sebomorafe, bong, maemo kgotsa ngwao.

L   Re dumela gore Modimo o rata go lere tshiamo le boammaruri le kagiso ka gale mo lefatseng.

Re dumela gore Modimo, ka mokgwa o o itlhaotseng, Ke Modimo wa ba ba sotlegang, Ke Modimo wa bahumanegi le ba ba gatelelwang ditshwanelo.

C   Modimo o dira tshiamo mo go ba ba gateletsweng.

O kgorisa ba ba mo tlaleng.

O golola ba ba golegilweng.

O dira gore difofu di bone.

O sireletsa batswakwa, dikhutsana le batlholagadi, mme O senya maano a ba ba bosula.

L   Re dumela gore Kereke ke leruo la Modimo, mme Kereke e tshwanetse go ema fa Modimo o emeng teng. E eme kgatlhanong le tshiamololo le go ema le ba ba siamololetsweng.

C   Ka mokgwa o o, re latlha le go tsholola molao mongwe le mongwe, le thuto nngwe le nngwe e e letlang tshiamololo go atlega.

L   Re bileditswe go ipobola le go dira tsotlhe go ikobela Jesu Keresete kgosi ya rona – le fa baeteledipele kgotsa melao e ganetsana le se, le fa e le kotlhao, le fa e le tshotlako, di ka re tlhagela.

C   Jesu ke kgosi, re tla Mo latela.

Go Modimo o le nosi – Rara, Morwa le Mowa o o Boitshepo – go isiwe tlotla le poko ka metlha le metlha.

AMEN